Oét ‘t ‘Golde Ei’ zien 2 kiepe gebaore!!

Aafgeloupe vriédaag, 13 jannewarie 2012 streeje 6 acts veur d’n titel ‘t ‘Golde Ei’. In ein drök bezôch Kefee De Locomotief goove de kandidate alles um ‘t nieje vastelaovestalent 2012 te waere. Ônder toezeend oug van 4 juryleeje, bestaonde oét Mirjam Alders, Johan Hendriks, Bibian Bauer en Marco Schell, woorte 5 eige geschreeve leedjes en ein eige geschreeve Buut ten gehuure gebrach. 
Nao flink beraod kwaam de jury mit ‘t verlossende antwaord: ‘t vastelaovestalent 2012 is gewaore: Lisa en Roos mit ‘t leedje ‘vleege’!

Ouk Stan woort nog ens extra in ‘t zunke gezatte. Stan deej neet mei veur de houfpriés, maar is ech mit eine moeie priés nao hoés gegaon. Hae kreeg namelijk ein Kwats shirt mit as opdrök ‘moelbôks’, iets waat netuurlijk perfec pas beej d’n buut dae hae iërder op d’n aovond prissenteerde.

De ‘Vaer de Woers’ van Stichting OB de Woers, ging dit jaor nao ein twiëtal dames: Yvon Ottenheim en Britte Peeters. Dit veur eur leedje “Alles kwiét”. Dit leedje had volges dees Stichting inhaldelijk de beste tekst.

De twië kersverse talente kriége ‘t de kômmende waeke drök. Neet allein interviews gaeve huurt beej deze nieje roem, maar veural vuuël optraeje op ô.a.: Naopraote Boeremoosbal, Seniorezitting in de Maaspoort, Jocus Pocus en nog vuuël miër optraejes in groët Venlo.

De kômmende paar waeke wuurt veur Lisa en Roos ein start van eur nieje carriére as vastelaovesartieste in groët Venlo! 
Meide hiël vuuël succes en plezeer!!!